Жетісу облысының полиция департаменті жыл басынан бергі есірткінің заңсыз айналымына қарсы күрес бойынша жедел-қызметтік жұмыстың қорытындысын ұсынды. Есепті кезеңде өңірде есірткіге байланысты 79 құқық бұзушылық тіркелді, бұл өткен жылдың ұқсас кезеңімен салыстырғанда өсім бар екенін көрсетеді. Оның ішінде 42 құқық бұзушылық есірткі қылмысы ретінде белгіленген.
Қылмыс құрылымына тоқталсақ — есірткі өткізудің 30 фактісі, аса ірі мөлшерде сақтаудың 6 фактісі, есірткі заттарын насихаттау мен жарнамалаудың 3 жағдайы, сондай-ақ шегілмейтін темекі бұйымдары мен электрондық шылымдардың заңсыз айналымы бойынша 1 факт тіркелді. Бұдан бөлек, ҚР ҚК-нің 297-1-бабы бойынша есірткі өндірудің 2 фактісі анықталды.
Жыл басынан бері заңсыз айналымнан барлығы 101 кг 488,19 грамм әртүрлі есірткі заттары тәркіленді. Тәркіленген заттардың негізгі бөлігін марихуана мен гашиш құрады. Заңсыз әрекеттері үшін 17 жастан 54 жасқа дейінгі 49 азамат ұсталды, олардың арасында 5 есірткі жасырушы (закладчик) болды. Қазіргі уақытта 57 қылмыстық іс сотқа жолданды.
Сондай-ақ 26 маусым бүкіл әлемде Халықаралық нашақорлыққа және есірткінің заңсыз айналымына қарсы күрес күні атап өтіледі. Үгіт-насихат науқанының өткізілуі жазғы демалыс кезеңімен тұспа-тұс келетінін ескере отырып, Жетісу облысында балаларды, жастарды және бейінді мамандарды барынша қамтуға бағытталған іс-шаралардың кешенді жоспары әзірленді:
* Жазғы лагерьлердегі білім беру блогы: Білім, мәдениет, дене шынықтыру және спорт басқармалары полиция қызметкерлерімен бірлесіп, мектеп жанындағы және қала сыртындағы сауықтыру лагерьлерінде демалатын балалар үшін тақырыптық кездесулер, интерактивті дәрістер мен тренингтер өткізеді.
* Тәрбиешілер мен тәлімгерлерді оқыту: Денсаулық сақтау басқармасымен және ҮЕҰ-мен бірлесіп, педагогтар мен әлеуметтік қызметкерлерге арналған жасөспірімдердегі тәуелділіктің алғашқы белгілерін тиімді тануға бағытталған ауқымды облыстық семинарлар ұйымдастырылады.
* Спорт пен мәдениет есірткі жүйесіне қарсы: Бейінді ведомстволар танымал спортшылардың, медиа тұлғалар мен еріктілердің қатысуымен марафондар, велошерулер, турнирлер мен көрмелер ұйымдастырады. Алаңдарда есірткі тұтынудың зиянды салдарларын түсіндіретін ақпараттық стендтер орнатылады. Балалардың қауіпсіздігіне ерекше назар аударылды — алғашқы есірткіге қарсы іс-шаралар 1 маусым – Балаларды қорғау күнінде бастау алды.