Жыл сайын 4 ақпанда атап өтілетін Дүниежүзілік қатерлі ісікпен күрес күні қарсаңында Жетісу облыстық көпсалалы клиникасы өңірдегі онкологиялық қызметтің өткен жылғы жұмысын қорытындылады. Бүгінде облыстың 700 мыңға жуық тұрғынына қызмет көрсететін орталық дертті ерте анықтау мен емдеу сапасын арттыруда айтарлықтай нәтижелерге қол жеткізді. Мәселен, өткен жылы диспансерлік есепке алынған 1 407 науқастың 67 пайызында, яғни 934 жағдайда ауру ең ерте сатысында анықталған.
Қазіргі уақытта клиникада жалпы саны 7 775 науқас есепте тұрса, олардың 65 пайызы бес жылдан астам уақыт бойы бақылауда болып, нәтижелі ем алып келеді. Дертті дер кезінде анықтау мақсатында жыл бойы «Ашық есік күні» өткізіліп, халық тексеруден өтті. Нәтижесінде 98 ісікке дейінгі жағдай мен 29 қатерлі ісік нышаны ерте анықталып, пациенттерге жедел көмек көрсетілді. Сонымен қатар, тек скринингтік тексерулердің өзі 143 жаңа жағдайды анықтауға мүмкіндік берді.
Инфрақұрылымды дамыту бағытында өткен жылы клиника базасында 20 төсектік модульдік күндізгі стационар салынды. Материалдық-техникалық база 70-тен астам жаңа жабдықпен толығып, облыстың аудандық ауруханаларына цифрлық және жылжымалы маммографтар таратылды.
Кадрлық әлеует те назардан тыс қалмады. Өткен жылы ұжымға 8 маман, оның ішінде 3 жас маман қабылданды.