Қазақстан Республикасының Денсаулық сақтау бірінші вице-министрі Тимур Сұлтанғазиев Жетісу облысына жұмыс сапарымен келді. Баспасөз мәслихаты барысында ол елдегі және өңірдегі денсаулық сақтау жүйесін дамытудың негізгі қорытындыларына тоқталып, медициналық көмектің сапасы мен қолжетімділігін арттыру бағытында іске асырылып жатқан шаралар туралы баяндады.
Бірінші вице-министрдің мәлімдеуінше, 2025 жылдың қорытындысы бойынша Қазақстанда күтілетін өмір сүру ұзақтығының рекордтық көрсеткіші тіркелген. Бұл көрсеткіш 75,97 жасқа жетіп, бүкіл бақылау тарихындағы ең жоғары деңгейді көрсетті. Жетісу облысында аталған көрсеткіш 75,71 жасты құрап, бір жыл ішінде 0,74 жасқа өскен.
Елімізде нәресте өлімінің көрсеткіші де тұрақты түрде төмендеп келеді. Жыл қорытындысы бойынша бұл көрсеткіш 14 пайызға азайып, тарихи ең төменгі шегіне жетті. Жетісу облысында нәресте өлімі 8,8 пайызға кеміді.
Басқа да көрсеткіштер бойынша оң динамика байқалады. Қан айналымы жүйесі ауруларынан болатын өлім-жітім 5 пайызға, ал жазатайым оқиғалардан, уланулар мен жарақаттардан болатын өлім деңгейі 6 пайызға төмендеді. Бұл ретте туберкулезден болатын өлім-жітім көрсеткіші бұрынғы деңгейде сақталды.
Медициналық көмектің қолжетімділігін арттыру мақсатында жалпы тәжірибелік дәрігерлердің қабылдау уақыты ұзартылып, медбикелердің өкілеттіктері кеңейтілді және онлайн-жазылу жүйесі енгізілді. Осы шаралардың нәтижесінде дәрігердің қабылдауын күту уақыты екі аптадан екі-үш күнге дейін қысқарды.
Сондай-ақ скринингтік бағдарламалардың аясы кеңейтілді. Тексеруден өтудің жас шегі 70-тен 76 жасқа дейін ұлғайтылды. Ерлер үшін инсульт қаупін ерте анықтауға бағытталған жаңа скрининг түрі енгізілді.
Бұдан бөлек, онкологиялық скринингтер МӘМС жүйесінен кепілдік берілген тегін медициналық көмек көлеміне ауыстырылды.
Цифрландыру саласында медициналық құжаттаманы жүргізуді автоматтандыруға мүмкіндік беретін ALIMA жүйесі енгізілуде. Бүгінгі таңда бұл жүйемен алғашқы медициналық-санитарлық көмек көрсететін 9 мыңға жуық дәрігер қамтылды.
Медициналық инфрақұрылымды жаңғырту жұмыстары жалғасуда. Қазақстанда 34 облыстық көпбейінді және аудандық аурухана, сондай-ақ 19 перинаталдық орталық жаңартылуда. Сонымен қатар, ревматология, нефрология, гастроэнтерология және респираторлық медицина бағыттары бойынша төрт ұлттық орталық құрылды.
Саланы білікті кадрлармен қамтамасыз етуге ерекше көңіл бөлінуде. Жыл сайын 5685 білім беру гранты бөлінеді. Жетісу облысы үшін 2025 жылы резидентураға 100 грант қаралған. Өңірге 58 жас маман тартылды.
Медицина қызметкерлерін қолдау мақсатында 8,5 миллион теңгеге дейін көтерме жәрдемақы төлемдері, жеңілдікті тұрғын үй несиесі және басқа да әлеуметтік қолдау шаралары қарастырылған.
2025 жылы мұндай көмекке ел бойынша 1760 дәрігер ие болды. Жетісу облысында 89 дәрігерге қолдау көрсетілсе, тағы 34 медицина қызметкері баспанамен қамтамасыз етілді.
2026 жылғы 1 қаңтардан бастап жедел жәрдем, инфекциялық қызмет және санитарлық-эпидемиологиялық қызмет қызметкерлері үшін жалақының 30 пайызына дейінгі мөлшерде қосымша үстемеақылар енгізіледі.
Сонымен қатар міндетті әлеуметтік медициналық сақтандыру жүйесін дамыту ісі жалғасып жатыр. 2025 жылғы шілдеде денсаулық сақтауды қаржыландырудың негізінен сақтандыру моделіне көшуін көздейтін заң қабылданды.
Басты жаңашылдықтардың қатарында — әлеуметтік осал санаттағы жұмыссыз азаматтарды жергілікті бюджет есебінен сақтандыру мәртебесімен қамтамасыз ету, медициналық қызметтердің сапасын бақылауды күшейту және қадағалаушы органдардың өкілеттіктерін кеңейту шаралары бар.
