2026 жылдан бастап Қазақстанның салық жүйесінде түбегейлі реформалар күтілуде. Бүгін өткен баспасөз мәслихатында жаңа Салық кодексінің негізгі бағыттары мен кәсіпкерлер үшін енгізілетін жеңілдіктер жарияланды. Ең басты жаңалық – салық режимдерінің қысқаруы және есептіліктің автоматтандырылуы.

Жаңа кодекс аясында салық жүйесін барынша қарапайым ету мақсатында қолданыстағы 7 режимнің орнына тек 3-еуі ғана қалдырылды. Енді кәсіпкерлер мына форматтардың бірін таңдайды:

Өзін-өзі жұмыспен қамтығандар режимі: жеке кәсіпкер ретінде тіркелмеген, жұмысшы жалдамайтын азаматтарға арналған. Табыс шегі – 300 АЕК. Салық декларациясын тапсырудың қажеті жоқ, тек табыстың 4%-ы мөлшерінде әлеуметтік төлем төленеді. Барлық процесс e-Salyq Business арқылы жүреді.

Оңайлатылған декларация: шағын және орта бизнес үшін. Салық мөлшерлемесі – 4 пайыз, бірақ жергілікті мәслихаттар оны екі немесе алты пайыз аралығында өзгерте алады. Бұл режимде қосымша құн салығы мен әлеуметтік салық төленбейді.

Шаруа және фермер қожалықтары: ауыл шаруашылығы үшін салық мөлшері табыс көзінен небәрі 0,5% пайыз болады. Фермерлер жер, көлік және әлеуметтік салықтардан босатылған.

Барлық салық төлеушілер 2026 жылғы 1 наурызға дейін өздеріне ыңғайлы салық режимін таңдап, хабарлама беруі тиіс. Егер кәсіпкер белгіленген мерзімде таңдау жасамаса, ол автоматты түрде ең күрделі салық түрі  «жалпыға бірдей белгіленген тәртіпке» көшіріледі.