Бүгін Талдықорған қаласының әкімі Ернат Бәзіл 2025 жылдың қорытындысы бойынша өткен баспасөз мәслихатында қаланың әлеуметтік-экономикалық дамуының негізгі нәтижелеріне тоқталып, алдағы жоспарларымен бөлісті.
Қала экономикасында тұрақты өсім сақталды. 2025 жылы жалпы экономикалық өсім 107% болды. Өнеркәсіп өнімінің көлемі 174,4 млрд теңгені, ал ауыл шаруашылығының жалпы өнім көлемі 39,4 млрд теңгені құрап, өсім 103,3% деңгейіне жетті. Бұл Талдықорған экономикасының орнықты дамып келе жатқанын айғақтайды.
Инвестициялар көлемі де артты. Жыл соңына дейін қала экономикасына 85 млрд теңге инвестиция тартылады. Бұл қаражат инфрақұрылымды жақсартуға, жаңа жобаларды жүзеге асыруға және кәсіпкерлікті дамытуға мүмкіндік береді.
Құрылыс саласы үшін де бұл жыл табысты болды. Өткен жылы 1283 тұрғын жаңа баспанамен қамтамасыз етілді. Оның басым бөлігі несиелік және жалдамалы тұрғын үйлер. Ал биыл 1400-ден астам отбасы жаңа пәтерге қол жеткізбек. Сондай-ақ, «Ынтымақ» тұрғын үй алабында 200 пәтерлі 5 көпқабатты үйдің құрылысы басталды. Нысан келесі жылы аяқталады деп жоспарлануда.
Сонымен қатар, қала әкімі баспасөз мәслихатында аулаларды абаттандыру, жол инфрақұрылымын жақсарту, әлеуметтік нысандар салу сияқты қала әлеуетін арттыруға бағытталған маңызды жобаларға да тоқталды.
Айта кетейік, Талдықорған қаласының 2025 жылғы әлеуметтік-экономикалық даму көрсеткіштері оң нәтижелерге қол жеткізгенін көрсетті. Әкім атап өткендей, қолға алынған жаңа жобалар мен бастамалар қаланың болашағын жарқын етіп, тұрғындардың өмір сүру сапасын арттыруға бағытталған.
