2025 жылдың 10 айында салықтар мен басқа да міндетті төлемдер жоспары толық орындалып, бюджетке 5,3 млрд теңгеден астам қаражат түсті. Оның ішінде республикалық бюджетке 1,4 млрд теңге, жергілікті бюджетке 3,9 млрд теңге бағытталған.

Өнеркәсіп саласында аталған кезеңде 9,2 млрд теңгенің өнімі өндірілді. Нақты көлем индексі 96,7 пайызды құрады. Бұл көрсеткіштің төмендеуі ауданнан «Медисон» ЖШС-нің көшуіне байланысты. Бөлшек тауар айналымы 4,7 млрд теңгені құрады.

Шағын және орта бизнес субъектілерінің саны 4 мыңға жуық бірлікті құрап, оларда 7,5 мыңнан астам адам жұмыспен қамтылды. Жыл басынан бері шағын және орта бизнес өкілдерінен бюджетке 2,2 млрд теңге түсті. Ауданда бірнеше ірі жобалар жүзеге асырылуда, олардың қатарында Қора өзеніндегі ГЭС құрылыстары, микрокальцит өндірісі және жаңа ауыл шаруашылығы нысандары бар. Олардың қатарында өнеркәсіп, энергетика және ауыл шаруашылығы бағыттары бойынша маңызды нысандар бар.

«Лито Микс» ЖШС микрокальцит және мәрмәр ұнын өндіру мен сақтауды ұйымдастыру жобасын толық іске қосты. Энергетика саласында Қора өзеніндегі ГЭС құрылысы жұмыстары жасалуда. Ауыл шаруашылығы саласында «Тоғайбаев» шаруа қожалығы 100 бас мал бордақылау алаңы жанынан жұмысшыларға арналған үй, қасапхана және сүрлем шұңқырын салу жобасын іске асыруда. Және өңірдегі шағын өнеркәсіп орындары да инвестиция тартып отыр. Екпінді ауылындағы «KOMAN» кәсіпорны әктас өнімін өндіру бағытында 25 млн. теңге инвестиция құйып, бүгінде 25 адамға тұрақты жұмыс орнын ұсынып отыр.