Бүгін Өңірлік коммуникациялар қызметінің алаңында «Әлеуметтік медициналық сақтандыру қоры» КЕАҚ Жетісу облыстық филиалы директорының орынбасары Арыстанбек Өтеғұлов қатысуымен баспасөз маслихаты өтті. Спикер өңір халқының Міндетті әлеуметтік медициналық сақтандыру (МӘМС) жүйесіне қатысу барысы және медициналық қызметтерді қаржыландыру туралы ақпарат ұсынды.

Спикердің айтуынша, облыстағы денсаулық сақтау субъектілеріне 652 мыңнан астам адам тіркелген. Оның ішінде 531 мыңнан астамының «сақтандырылған» мәртебесі бар, ал 121 мың тұрғынның мәртебесі әлі өзектілендірілмеген.

Жетісу облысының денсаулық сақтау жүйесінің бюджеті шамамен 85 млрд теңгені құрайды. Оның 39,1 млрд теңгесі МӘМС жүйесіне, ал 45,2 млрд теңгесі тегін медициналық көмектің кепілдендірілген көлеміне бағытталған. Ағымдағы жылдың тоғыз айында өңір тұрғындарына жалпы сомасы 27,6 млрд теңгеге медициналық көмек көрсетілді.

Айта кету керек, МӘМС қаражаты есебінен жоғары технологиялық операциялар да қаржыландырылады. Мәселен, облыстық кардиологиялық орталықта тоғыз ай ішінде 246 күрделі операция жасалды.

Филиал директорының орынбасары өңірде медициналық қызметтердің сапасына бақылау күшейтілгенін атап өтті. Жыл басынан бері жүргізілген тексерулер нәтижесінде 108 мыңнан астам заңбұзушылық анықталып, оның қорытындысы бойынша 837 млн теңгеден астам сомаға экономикалық ықпал ету шаралары қолданылған.