АҚ «Отбасы банк» Жетісу облыстық филиалы облыс әкімдігінің қолдауымен әлеуметтік маңызы бар сала қызметкерлеріне арналған «Маман» тұрғын үй бағдарламасының басталғанын хабарлайды. Өтінім беру 25-ші тамыздан бастап 5-ші қыркүйекке дейін жалғасады. Бұл туралы АҚ «Отбасы банк» Жетісу облыстық филиалы және Жетісу облысының Энергетика және тұрғын-үй коммуналдық шаруашылық басқармасының өкілдері мәлімдеді.
Жоба өңірдегі ұстаздар, дәрігерлер, журналистер, мәдениет және спорт саласы өкілдері, энергетика мен туризм мамандары, сондай-ақ мемлекеттік корпорация мен саяси партиялар филиалдарының қызметкерлері үшін қолжетімді баспана алуға мүмкіндік береді.
Бағдарламаға қатысу үшін үміткердің жасы 63-ке дейін болуы, соңғы бес жылда жылжымайтын мүлікке ие болмауы және кемінде үш жыл бойы Жетісу облысында тұрақты тіркеуде тұруы қажет. Сонымен қатар, өтініш беруші соңғы 12 айда аталған салалардың бірінде ресми еңбек қызметін атқаруы тиіс. Бағдарламаға ерлі-зайыптылардың тек біреуі ғана қатыса алады.
Қатысушыларды іріктеу балдық жүйе бойынша жүзеге асырылады. Жас ерекшелігі, еңбек өтілі, отбасылық жағдайы, балалардың саны, тұрғын үй кезегіндегі мәртебесі, жинақ сомасы және өңірде тіркелу мерзімі ескеріледі. Мысалы, 35 жасқа дейінгі талапкерлерге 5 балл, әлеуметтік салада әрбір жылдық еңбек өтілі үшін қосымша ұпай, некедегі жылдар мен балалар санына байланысты да артықшылық беріледі. Сондай-ақ тұрғын үй кезегінде тұрғандарға қосымша балл қарастырылған.
Бағдарламаға қатысу үшін жергілікті атқарушы органнан жолдама алып, жеке куәлік, неке туралы немесе оның бұзылғанын растайтын құжат, балалардың туу туралы куәліктері, жалақы мен зейнетақы жарналары жөніндегі анықтамалар, жылжымайтын мүлікке қатысты мәліметтер ұсынылуы тиіс. Жеке кәсіпкерлер соңғы 12 айдағы банк шотының үзіндісін тапсырады.