Жетісу облысында 68% халықтың ауылдық жерде тұруы, әлеуметтік инфрақұрылымды дамыту және қолжетімді медициналық көмекті қамтамасыз ету аймақтық саясаттың басты басымдықтары болып қала береді. Бүгінде өңірде 354 медициналық нысан (305 мемлекеттік және 49 жекеменшік) жұмыс істейді, дегенмен негізгі міндет – аудандардағы бастапқы медико-санитариялық көмек деңгейін нығайту.

Қазіргі уақытта 120 маманды (оның ішінде акушер-гинекологтар, жалпы практика дәрігерлері, инфекционистер мен хирургтар) құрайтын кадр тапшылығы мәселесін шешу үшін осы жылы жергілікті бюджеттен 151 резидентті даярлауға 488 млн теңге бөлінді. Сонымен қатар әлеуметтік қолдау шаралары да жүзеге асырылуда: Көксу ауданында 15 медицина қызметкері жаңа пәтерлердің кілтін алса, ауылға жұмысқа келген 20 маманға біржолғы көтермеақы берілді.

Сондай-ақ өңірде шұғыл медициналық көмек қызметі де жетілдіріліп жатыр: жедел жәрдемнің 69 шығу бригадасының 47-сі аудандарда жұмыс істейді, ал 98 санитарлық автокөліктің дерлік 70%-ы дәл осы ауылдық жерлерде тартылған.

Жетісу облысында ауыл тұрғындары үшін денсаулық сақтау ұйымдарының желісін жаңарту бойынша ауқымды жұмыстар жүргізілуде. Саланы дамытуға «Ауылдық денсаулық сақтауды модернизациялау» ұлттық жобасын жүзеге асыру үлкен серпін берді.

2024–2025 жылдары өңірде 59 жаңа медициналық нысан салынып, пайдалануға берілді: оның ішінде 39 фельдшерлік-акушерлік пункт (ФАП), 15 дәрігерлік амбулатория және 5 медициналық пункт бар.

Бұдан бөлек, Панфилов ауданында құны 8,8 млрд теңге болатын Жаркент қалалық ауруханасын реконструкциялау жұмыстары жалғасуда. Нысанда 151 жұмысшы мен арнайы техника жұмылдырылған, техникалық дайындығы 34%-дан асады, ал нысанды пайдалануға беру 2026 жылдың желтоқсанына жоспарланған. Бұл шаралардың барлығы ауыл тұрғындарының тұрғылықты жері бойынша сапалы медициналық көмек алуын қамтамасыз етуге бағытталған.