Бүгін еліміздің қоғамдық-саяси өміріндегі маңызды шешім шығатын сәт. Осыған орай, Жетісу облысы бойынша учаскелер өз жұмысын бастады. Соңғы нақтыланған мәліметтерге сәйкес, өңірдегі сайлаушылардың жалпы саны 437 729 адамды құрайды, – деп хабарлайды 7-su.kz ақпараттық порталы.

Дауыс беру процесін сапалы ұйымдастыру үшін облыс аумағында 468 учаске жұмыс істеуде. Оның ішінде азаматтардың белгілі бір топтары үшін 40 арнайы учаске жасақталған. Атап айтқанда:

• 21 учаске – әскери бөлімдер мен шекара заставаларында;

• 10 учаске – уақытша ұстау изоляторларында (ИВС);

• 8 учаске – денсаулық сақтау объектілерінде;

• 1 учаске – интернат үйінде орналасқан.

Референдумның ашықтығы мен заңдылығын қамтамасыз ету мақсатында 479 референдум комиссиясы жұмылдырылды. Олардың ішінде 11 аумақтық және 468 учаскелік комиссия бар. Бұл ауқымды іске барлығы 2 989 комиссия мүшесі қатысып, дауыс беру барысын қадағалап, ұйымдастыру шараларын жүзеге асырады.

Қазіргі таңда барлық учаскелер қажетті техникалық құралдармен, ақпараттық стендтермен және дауыс беруге арналған жабдықтармен толық қамтамасыз етілген. Сайлаушылар тізімінің уақтылы берілуі әрбір азаматтың өз таңдауын жасау құқығын жүзеге асыруға мүмкіндік береді.