Елімізде биыл алғаш рет «Әлеуметтік қорғау жүйесінің үздік жұмыскері және үздік әлеуметтік жоба» республикалық конкурсы өтеді. Бұл бастама ҚР Еңбек және халықты әлеуметтік қорғау министрлігінің 2025 жылғы 19 тамыздағы №252 бұйрығына сәйкес қолға алынды. Бұл туралы Жетісу облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Сания Наурызбаева БАҚ өкілдерімен өткен баспасөз мәслихатында мәлімдеді.
Конкурстың негізгі мақсаты – әлеуметтік сала мамандарының еңбегін кеңінен танытып, олардың қоғамдағы мәртебесін арттыру, үздік тәжірибелерді анықтап, оларды тарату. Сонымен қатар, азаматтардың осал топтарын қолдауға бағытталған әлеуметтік жобаларды іріктеп, жаңа әдістер мен тәсілдерді енгізуге ынталандыру да көзделіп отыр.
Байқауға әлеуметтік қызмет көрсететін орталықтардың мамандары, үйде қызмет көрсету ұйымдарының әлеуметтік жұмыскерлері, әлеуметтік инспекторлар, медициналық-әлеуметтік сараптама бөлімдерінің қызмет-керлері, педагогтар, еңбек мобильділігі орталықтарының өкілдері және қоғамдық бірлестіктер қатыса алады. Жарыс жеті номинация бойынша ұйымдастырылады.
Конкурс екі деңгейде – облыстық және республикалық деңгейде өтпек. Өңірлік кезеңді облыстық жұмыспен қамтуды үйлестіру және әлеуметтік бағдарламалар басқармалары жүргізсе, республикалық кезеңді министрлік ұйымдастырады. Өтінімдер 30 қыркүйекке дейін қабылданады. Құжаттарды қағаз түрінде облыстық басқармаларға тапсыруға немесе qamqor.enbek.kz порталы арқылы электронды форматта жіберуге болады.
Қазан айының алғашқы күндері бірыңғай платформада онлайн дауыс беру ұйымдастырылып, өңірлік жеңімпаздар облыстық комиссия шешімімен анықталады. Ал үздік шыққан жұмыстар 13-22 қазан аралығында республикалық деңгейде қаралып, 23 қазанда қорытындысы жарияланады. Жеңімпаздарды марапаттау рәсімі 24 қазанда Астана қаласында өтеді.
Ұйымдастырушылардың айтуынша, бұл конкурс әлеуметтік сала мамандарының беделін арттырып қана қоймай, олардың еңбегін қоғамға кеңінен танытуға мүмкіндік береді. Сонымен қатар, әлеуметтік қызмет көрсету жүйесін дамытуға бағытталған жобаларға жаңа серпін беріп, саладағы оң тәжірибелерді кеңінен насихаттау көзделуде.