Қазақстан Республикасы Үкіметінің отырысында Оқу-ағарту министрі мектепке дейінгі тәрбие мен оқыту саласындағы мемлекеттік шаралардың іске асырылуы туралы баяндады – деп хабарлайды Оқу-ағарту министрлігінің баспасөз қызметі.

Мемлекет басшысының тапсырмасына сәйкес, 2024 жылдан бастап Қазақстанда кезең-кезеңімен мектепке дейінгі ұйымдарды ваучерлік қаржыландыру жүйесі енгізіліп келеді. Бұл  механизм қызметтердің қолжетімділігі мен сапасын арттырады, сондай-ақ мектепке дейінгі білім беру саласында ашықтықты қамтамасыз етеді. Бүгінде жоба еліміздің 20 қаласында және 7 ауданында жүзеге асырылуда.

«Пилоттық жобаны іске асыру кезінде балабақшалардағы кезектілік  93 мың орынға қысқарды. Нәтижесінде 7,7 млрд теңгеден астам бюджет қаражаты үнемделді. Бұл тәжірибені қыркүйек айынан бастап  жылдың соңына дейін барлық балабақшаларға кезең-кезеңімен енгізу жоспарланып отыр», – деді Ғани Бейсембаев.

Жаңа оқу жылынан бастап балалардың мемлекеттік тілді ерте меңгеруіне бағытталған «Тілге бойлау» және бұған дейін еліміздің 5 өңірінде сынақтан өткен «Беске дейін үлгер» бағдарламаларының ауқымын кеңейту басталады. Осы уақыт аралығында 135 балабақшада 7 мыңнан астам бала мемлекеттік тілді меңгерді.

Мектепке дейінгі ұйымдардағы тәрбие жұмыстарының басым бағыттарының бірі – балаларды ерте жастан еңбекке баулу. Осы мақсатта қыркүйектен бастап 100 балабақшада 12 мың баланы қамтитын жаңа жоба пилоттық режимде іске қосылады.

Айта кетейік, бүгінде Қазақстанда 1 млн-нан астам бала тәрбиеленетін 11,8 мың балабақша жұмыс істейді.